|
1960an
Gasteizen sortua. 1981ean 30 urteko kartzela zigorra jaso eta
2002an atera zen kartzelatik. Espetxe hauetan egon zen preso:
Carabanchel, Puerto de Santa Maria, Herrera de la Mancha eta
Caceresen.
“Loreak
udan ihintza bezala” abestiaren letra 1998an “Bart
irakurtzeko gaur izkiriatua” (Susa) liburuan argitaratu
zen. Letra bere maiteari idazten dion preso baten gutuna da,
inpotentziaz, amorruz eta esperantzaz beterik.
LOREAK
UDAN IHINTZA BEZALA
Hika eginen dinat, hasiera
hartan bezala.
Egunez amodio poemak egin
eta gauez
dadaisten antzera
desegiten nituenean bezala...
Haiek ez
zitunan poema dadaistak ez deus;
amodio poemak nahi zitenan,
baina nik,
ahalkez, mozorrotuak behar nitinan.
Denboraren
joanak
Ulise bihurtu ninduelakoan,
lurralde ez etsai baten
bila,
maitasun gutunek erridikuloak
izan behar dutela
irakurritakoan
neure bertso berri kaxkar eta
egartsuen
freskagarri hindudan,
loreak udan ihintza
bezala...
Eta
ez nionan
hosto iharren kexuari erreparatu
eta ustekabean
negua iritsi zelarik
izotz beltzak atzamarrak moteldu
zizkidanan.
Nolanahi ere,
oraino uste dinat
meteorologoek,
zer gerta ere, oharrarazi behar
luketela
itsasaldera hurbiltzen haizen bakoitzean.
Eta
Ulise ez naizen arren nire baitan baziraun
Itakaminak, eta
orain hika deginat berriz,
etsipenaren mintzamoldea balitz
bezala, ezen
mezu
desesperatuek diten segurrenik
esperantzarik gehien gordetzen.
Nire mezua,
basapiztia kikildua, ihesi zoan
hire soaren
abaro epelera, hire begiek
jakingarri egin dezaten,
Itaka
inoizko aberri urruna soilik izan ez dadin.
[atzera]
|
